Estyn yw’r Arolygiaeth Addysg a Hyfforddiant yng Nghymru ac mae ganddo genhadaeth amrywiol a phwysig: cyflawni rhagoriaeth i bob dysgwr yng Nghymru trwy wella safonau ac ansawdd addysg a hyfforddiant. Rydym yn darparu gwasanaeth arolygu a chyngor o ansawdd uchel i Lywodraeth Cynulliad Cymru a dinasyddion Cymru.

• Sicrhau mai dysgwyr a dinasyddion sydd wrth wraidd ein   gwaith;
• Gweithredu gyda didwylledd, gonestrwydd a gwrthrychedd,   gan ddangos y safonau uchaf o wasanaeth cyhoeddus;
• Gweithio mewn partneriaeth ag eraill, tra’n cynnal ein   hannibyniaeth;
• Dangos arweinyddiaeth a gwaith tîm effeithiol ar bob lefel;
• Gwerthfawrogi pobl a’r cyfraniadau a wnânt;
• Annog cyfrifoldeb, menter ac arloesedd; a
• Meithrin amgylchedd gwaith iach sy’n ennyn diddordeb.

Fel un o’n Harolygwyr, byddwch yn teithio ledled Cymru yn cynnig cyngor ar sut gall darparwyr addysg a hyfforddiant ddatblygu a gwella. Byddwch wedyn yn adrodd ar y safonau a gyflawnir gan y dysgwyr, ansawdd yr addysg a’r hyfforddiant a ddarperir ac effeithiolrwydd arweinyddiaeth a rheolaeth y darparwr. Byddwch yn gweithio fel arbenigwr yn eich pwnc, eich agwedd neu’ch sector eich hun, ac yn fwy cyffredinol ar draws ystod o sectorau. Byddwch hefyd yn cael cyfle i ddylanwadu ar bolisïau cenedlaethol trwy ddarparu cyngor arbenigol ac i hyrwyddo gwelliant trwy ledaenu’r arfer orau a welwn ar draws y system. Yn y pen draw, bydd y cyngor a’r argymhellion yr ydych yn eu rhoi yn dylanwadu ar ddyfodol dysgu ledled y wlad.

Mae hon yn rôl ddylanwadol mewn addysg a hyfforddiant, felly rydym yn chwilio’n benodol am ymgeiswyr sy’n dangos y trylwyredd a’r ymroddiad i wella safonau i ddysgwyr.

Ar hyn o bryd, rydym yn chwilio am rolau ar gyfer y rhai hynny sydd â hanes da mewn addysg, yn ddelfrydol mewn rôl reolaethol neu arbenigol mewn un sector neu fwy, a’r gallu i ddefnyddio gwybodaeth arbenigol ac arbenigedd mewn addysg, polisi a gwella ansawdd mewn o leiaf un o’r meysydd canlynol:

• Mathemateg (cynradd a/neu uwchradd)
• Gwyddoniaeth (cynradd a/neu uwchradd)
• Anghenion Addysgol Arbennig
• Addysg Gynradd

Bydd profiad arolygu o fantais, ond nid yw’n hanfodol. Ar gyfer o leiaf un o’r swyddi hyn, mae’n hanfodol ein bod yn penodi rhywun sy’n gallu defnyddio eu medrau cyfathrebu yn effeithiol yn Gymraeg ac yn Saesneg.

Ceir mwy o fanylion am y rôl, gan gynnwys disgrifiad o’r rôl a manyleb yr unigolyn, ar y daflen ‘Gwybodaeth i Ymgeiswyr’ sydd ar gael i’w lawrlwytho isod.

Mae gyrfa gydag Estyn yn cynnig pensiwn rhagorol, ac ystod o fuddion, gan gynnwys:

• gwiriadau iechyd blynyddol am ddim;
• gostyngiad mewn ffioedd campfa;
• Rhaglen Cymorth i Weithwyr; a
• mynediad at gymdeithasau gofal iechyd meddygol.


Rydym yn cynnig buddion sy’n gyfeillgar i deuluoedd, gan gynnwys gweithio’n hyblyg a gwyliau hael ar gyfer cyfnod mamolaeth, mabwysiadu, tadolaeth a rhieniol, ynghyd â darpariaethau ar gyfer gwyliau arbennig â thâl a heb dâl a seibiannau gyrfa.

Yr ystod cyflog gyfredol ar gyfer Arolygwyr Ei Mawrhydi (Gradd 6) yw £54,500 - £66,800.

Mae ein prif swyddfa yng Nghaerdydd ac mae gennym swyddfa arall yn yr Wyddgrug, yng ngogledd Cymru. Bydd arolygwyr wedi’u lleoli yn un o’r swyddfeydd hyn, lle darperir digon o leoedd parcio. Ar ôl cwblhau cyfnod prawf yn llwyddiannus, gallech fod yn gymwys i wneud cais am gael gweithio gartref. Estyn fydd yn gwneud penderfyniadau ynglŷn â lleoliad, ar sail anghenion lleoli. Efallai y bydd yn ofynnol i chi weithio yn y naill swyddfa neu’r llall yn ystod cyfnod eich gwasanaeth ac efallai y bydd yn ofynnol i chi weithio y tu allan i oriau swyddfa arferol, yn dibynnu ar y ddarpariaeth neu’r gwasanaeth sy’n cael ei (h)arolygu.

Mae’r rôl yn gofyn am deithio ac aros dros nos cryn dipyn. Felly, dylai fod gan ymgeiswyr drwydded yrru gyfredol a’r gallu i ddefnyddio car hefyd. Telir costau teithio a chynhaliaeth yn unol â chyfraddau Estyn.

Gallwn ystyried cymorth ariannol ar gyfer adleoli.

Cliciwch ar y dogfennau atodedig i gael gwybod mwy a gwned cais am swyddi Arolygwyr Ei Mawrhydi (AEM).

• Gwybodaeth i Ymgeiswyr
• Dogfen Arweiniad
• Ffurflen Gais